EBE_Auto_Loan

ثلاث قصائد قصيرة ..الشاعر الكبير/ إبراهيم عبد الفتاح

يسر جريدة الأهالي أن تقدم لقرائها صفحة إبداعات تواكب الحركة الأدبية المعاصرة في مصر و العالم العربي و الترجمات العالمية ..وترحب بأعمال المبدعين و المفكرين لإثراء المشهد الأدبي و الانفتاح على تجاربهم الابداعية..يشرف على الصفحة الكاتبة و الشاعرة/ أمل جمال . تستقبل الجريدة الأعمال الابداعية على الايميل التالي: Ahalylitrature@Gmail.Com

123

ثلاث قصائد قصيرة ..الشاعر الكبير/ إبراهيم عبد الفتاح

———————

* أنا مش بحبك كلما أمكن

ولا أد ما تيسر

الحب ينقص لما يتفسر

يكفيني اقولك ضحكتك فراشات

لمسة إيديكي بلاد من الدهشة

وحنان عنيكي يدوب الأحزان

مع كل بوسة باتولد تاني

و ف كل حضن محاولة للطيران.

————–

باشربها سادة*

طعم الفطام والشجن

والحب والوحدة

باشربها علي مهلي

واسيبها تسرح ف بدني

وتفتح

كأنها وردة

باشربها سادة

لا هزيمة ولا أحزان

باشربها سادة

مش فوبيا من السكر

لكن لأنه بيفسد

قراية الفنجان.

—————

باقول لها : الأرض قليلة أوي النهاردة*

قالت لي : عشان مفيش عصافير

السما بقت أصغر من طيارة ورق

وقل جداً نصيبنا من الوجع

وان كان معاك حلم أو اتنين متأجلين

ربنا يعوض عليك فيهم

او تستنى لما ربنا يرزقك بنوم على قدهم

مانت شايف الناس في الشوارع من غير عيون

ومحدش بقى يسأل فين المرايات

إمبارح مثلاً كان نفسي أسمع فيروز

التلفزيون في الفندق قعدة تواليت

والبنت اللي بتخدم في المطعم

مابيحلالهاش الدق بكعبها فوق راسي

غير لما بانام.

..

اترك تعليق

يرجي التسجيل لترك تعليقك

شكرا للتعليق