وطن يعنى انا و اهلى واصحابى و الشجرة اللى قدام بيتنا مدرستى وذكرياتى كل مكان قعدت فيه وفرحت حتى المكان اللى شاف انكساراتى ودموعى لما حزنت الوطن يعنى مدفن ابويا واجداداى لما اروح ازورهم واقرالهم الفاتحه..
وطن يعنى مستشفى لما انكسرت لقيت فيها طبيب يعالجنى وكيس دم اتنقل لى من واحد من الوطن معرفوش
وطن يعنى الهوا اللى بتنفسه والمايه اللى بشربها وطن كل حاجه ربنا خلقها لى وطن يا عم مهدى أو احمد بتاع الفول الصبح لما اروح اجيب الفطار وطن يعنى صحبى اللى بشكى له همى وطن يعنى امى اللى بروح انام فى حجرها وقولها ارقينى كل ده بعيشه وعيشته فى الوطن صحيح ممكن الحال يبقى ضيق في الوطن بس فى أيام عشتها فى خير الوطن وكلها ارزاق ربنا
وطن يعنى عسكرى بلدى اللى واقف ينظم المرور زمان فى العباسيه .. وكان جدى يقولى شعور وحش جدا لما تلاقى عسكرى انجليزي يقولك تمشى ازاى تحس بغربه فى الوطن عاشوا اللى خرجوا الإنجليز عاشوا اللى رجعوا القناه عاشوا اللى رجعوا سينا تانى لسيادة ابن الوطن ..
عاش كل مصرى حط مصر فى عنيه لان فعلا مصر وطن
عارفين صلة الرحم هى بداية حب الوطن لما تحب اهلك وتصلهم حتحب وطنك لان اهلك عايشين فيه
عارف لما تروح تؤدى الخدمة العسكرية.. نت رايح تصل رحمك لانك رايح تدافع عن امك و ابوك وأخواتك واصحابك كل دول هما وطنك فـ حب الوطن من صلة الرحم
اوعى تسمع لآفّاق يقولك الوطن بيديك ايه
اقوله : بيديك أب وأم ومدرسة.. حتى لو بسيطه .. بس نحمد ربنا على المتاح ونعظّمه ، ” زويل ” طلع من على دكه فى اسكندريه و”نجيب محفوظ” من حوارى الحسين و”طه حسين “من دروب الريف وريحه البيوت الطين.
اوعى تشتكى الفقر ، اشتكى سوء التفكير ، وأعى تنسى أن بكره جاى شايل خير كتير.. عيش بنفسك لنفسك ولناسك ولا يهمك ميديا ولا سوشيال يا عم.
مصر بأهلها على جميع المستويات ..مصر ولاده ..وانت ابنها قوم عافر واجتهد ذاكر وحصّل علم تواجه بيه أعداء الأمه اللى عايزين يركعوك و يأسوك فى الحياه.
لسه فى أمل أنت الشمعة اللى بتنور الطريق انت ابن وطنك بجد
مش وطن الاغانى انت ابن ابوك وامك
ابن الوطن بمعناه الحقيقى، ابن الغيطان والورش والمصانع ،ابن الطبيب، ابن الفلاح ،ابن العامل ، ابن العرقانين مش ابن الساحل لان الساحل ٣ شهور بس لكن الوطن طول الدهر ،عشتى يا بلدى يا بسمه على شفايف طفل ماسك كتابه بيقول انا بكره بتاعى ومستقبلى هنا فى حضن امى وابويا
وطن يعنى كل من تحب
وطنك غالى خاف عليه
وطنك رحمك أوصله من غيره انت ايه؟؟؟
التعليقات متوقفه