شعر عاشــقـة

شيماء الغيطي
لما اقولك انى عاشقه
ابقا فعلا جد عاشقه
واما اقولك امتى ترجع
يبقى تفهم
ان ليك ف القلب وحشه
واما اقولك
لسه فاضل قد ايه
ف بعد المسافه
بابقى عاوزه الحقلى
ضحكه وابتسامه
مش فضول
والله ابدا
او رخامه
والا رغبه منى حتى
ف الملامه
بس حب وعشق
دوب روحى
وعينيك السلامه
عارف انت
انى اغلب م الغلابه
ست بتحب بكيانها
بكل حاجه
لما قلت انا مشبهكشى
الكلام جدا وجعنى
والدموع خنقت ملامحى
مشبهكشى!؟
بص طيب
ف المرايا
خط حاجبك خط عمرى
والعنين لعينيا كوبرى
شم ريحتك تلقى ريحتى
مشبهكشى لسه برضه
بص اكتر ف المرايا
شوف ملامحك
شايله كام مليون علامه
عارف انت
يمكن الغيره
اللى بنت الكلب قاتله
دى اللى بتخلينى هبله
دى اللى بتلخبط كيانى
لما بالمح ضحكتك
دى لحد.تانى
باتقلب من جوه جوه
وابدء اغلط ف المعانى
اللى جوه القصد
ميقلهوش لسانى
جايز الاحساس وصلك
انى فعلا مشبهكشى
لما لخبطت الامانى
وابتديت القاك ف بالى
حلم عمرى اللى ف خيالى
واحة الاحلام ولحن الروح
وتشبيكة امالى
اعذر الاحلام ف روحى
دى مش بايدى
باوعدك هامسكها دايما
لما تيجى
هاوعى تفلت
من ضلوعى
وأحبسك دم ف وريدى
بس اوعى تقولها تانى
والنبى عارفاه حبيبك.